يا مصر قومى وهللى .. فكى الحروف وأتكلمى ..ميت شهيد بيزوقوكى.. ميت شهيد بيلبسوكى ..وميت شهيد بيكلموكى ..مليون ولد من ولادك بيلضموا سبحة أيدين حوالين الميدان .. بيفكرونى بثوار زمان .. صلاح وعرابى والظاهر كمان .. لما ركبوا فوق الحصان .. ووقفو لباشا وباش اغا وطلعوه بره الديوان .. يا مصر قومى أتزلزلى .. يا مصر يالله أتزمزمى وأسمعى صوت الآدان ….. الوحى جاى .. بيزفلك مليون خبر لآبنك همام .. جوه الميدان داير فيه معركة .. بين الشباب والتركمان .. كل ده وفيه فرح و فيه عروسة .. بيزوقوها ويشوروها لعريس جدع .. منتظر هنا ف نفس المكان .. وفيه شباب دايرين يغنو غنوة أمل .. ..يا مصر قومى وشوفى الجنينة طرح فرح .. و الورد شابك فى الميدان .. العبير ريحتة فايحة فى المكان .. المسك عنبر والورود زهر الريحان.. والفل بيلضموه عقد لولى للقمر علشان يبان ..مهما أحكى الحكاوى مش حا تخلص ولا الكلام .. يا مصر قومى أستقبلى بشرة حياة لكل البشر .. فيه مولولد جديد بيتولد هنا ف الميدان .. دعوة حرة يسمع صداها كل البشر .. يتعلموا أزاى شبابك بيمد ايده بالسلام..
معلم فحمه …………
موضوع: يا مصر قومى وهللى 
الخميس فبراير 10, 2011 9:41 pm